ರಾಜ್ಯದ ಸರ್ಕಾರಿ ನೌಕರರಿಗೆ ಮತ್ತು ಅವರ ಕುಟುಂಬ ಸದಸ್ಯರಿಗೆ ಅನುಕೂಲವಾಗುವಂತೆ ಸರ್ಕಾರವು ಮಹತ್ವಾಕಾಂಕ್ಷೆಯ 'ಕರ್ನಾಟಕ ಆರೋಗ್ಯ ಸಂಜೀವಿನಿ ಯೋಜನೆ' (KASS) ಯನ್ನು ಜಾರಿಗೆ ತಂದಿದೆ. ಇದು ನಗದುರಹಿತ ವೈದ್ಯಕೀಯ ಚಿಕಿತ್ಸಾ ಸೌಲಭ್ಯವನ್ನು ಒದಗಿಸುವ ಸಮಗ್ರ ಆರೋಗ್ಯ ವಿಮಾ ಯೋಜನೆಯಾಗಿದೆ. ಅಕ್ಟೋಬರ್ 1 ರಿಂದ ಜಾರಿಗೆ ಬಂದಿರುವ ಈ ಯೋಜನೆಯ ಸಂಪೂರ್ಣ ವಿವರ ಇಲ್ಲಿದೆ.
ಯೋಜನೆಯ ಪ್ರಮುಖ ಅಂಶಗಳು
- ಅನುಷ್ಠಾನ: ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆಯ ಅಡಿಯಲ್ಲಿ ಬರುವ ಸುವರ್ಣ ಆರೋಗ್ಯ ಸುರಕ್ಷಾ ಟ್ರಸ್ಟ್ ವತಿಯಿಂದ ಯೋಜನೆ ಅನುಷ್ಠಾನಗೊಳ್ಳುತ್ತದೆ.
- ವ್ಯಾಪ್ತಿ: ಈ ಯೋಜನೆಯ ವ್ಯಾಪ್ತಿಯಲ್ಲಿ ಸುಮಾರು 2000 ಕಾಯಿಲೆಗಳಿಗೆ ಚಿಕಿತ್ಸೆ ಲಭ್ಯವಿದೆ.
- ಚಿಕಿತ್ಸಾ ವಿಧಾನ: ನೌಕರರು ಹಾಗೂ ಅವರ ಕುಟುಂಬದವರು ಸರಕಾರಿ ಆಸ್ಪತ್ರೆಗಳು ಮತ್ತು ಯೋಜನೆಯಡಿ ನೋಂದಾಯಿತ ಖಾಸಗಿ ಆಸ್ಪತ್ರೆಗಳಲ್ಲಿ ನಗದುರಹಿತ ಚಿಕಿತ್ಸೆ ಪಡೆಯಲು ಅವಕಾಶವಿದೆ.
ಅರ್ಹತೆ ಮತ್ತು ವಂತಿಗೆ ವಿವರ
1. ಅರ್ಹರು ಯಾರು?
- ರಾಜ್ಯ ಸರಕಾರಿ ನೌಕರರು ಮತ್ತು ಅವರ ಅವಲಂಬಿತ ಸದಸ್ಯರು (ಕೆಲವು ಇಲಾಖೆ/ಗುಂಪುಗಳನ್ನು ಹೊರತುಪಡಿಸಿ) ಯೋಜನೆಯಡಿ ಅರ್ಹರು.
- ಪ್ರೊಬೇಷನರಿ ಅವಧಿಯಲ್ಲಿದ್ದರೂ ನೌಕರರು ಅರ್ಹರಾಗಿರುತ್ತಾರೆ.
- ಮಲಮಕ್ಕಳಿಗೂ ಈ ಯೋಜನೆಯಡಿ ಸೌಲಭ್ಯ ಪಡೆಯಬಹುದು.
- ನೋಂದಣಿ ಐಚ್ಛಿಕವಾಗಿದೆ. ಈ ಯೋಜನೆ ಬೇಡ ಎನ್ನುವವರು ದೂರ ಉಳಿಯಬಹುದು.
2. ಮಾಸಿಕ ವಂತಿಗೆ (ಕಂತು)
ನೌಕರರ ಗುಂಪಿನ ಆಧಾರದ ಮೇಲೆ ನಿಗದಿತ ವಂತಿಗೆ ಮೊತ್ತವನ್ನು ವೇತನದಲ್ಲಿಯೇ ಕಡಿತಗೊಳಿಸಲಾಗುತ್ತದೆ:
| ನೌಕರರ ಗುಂಪು | ಮಾಸಿಕ ವಂತಿಗೆ |
| ಗ್ರೂಪ್-ಎ | ₹1,000 |
| ಗ್ರೂಪ್-ಬಿ | ₹500 |
| ಗ್ರೂಪ್-ಸಿ | ₹350 |
| ಗ್ರೂಪ್-ಡಿ | ₹250 |
3. ಪತಿ-ಪತ್ನಿ ಸರ್ಕಾರಿ ನೌಕರರಾಗಿದ್ದರೆ
- ಇಬ್ಬರೂ ಸರಕಾರಿ ನೌಕರರಾಗಿದ್ದರೆ, ಹೆಚ್ಚಿನ ಮೂಲ ವೇತನ ಪಡೆಯುವವರು ಮುಖ್ಯ ಕಾರ್ಡ್ ಹೋಲ್ಡರ್ ಆಗಿ ನೋಂದಾಯಿಸಿಕೊಳ್ಳಬೇಕು.
- ಆದರೆ, ಇಬ್ಬರೂ ತಮ್ಮ ಪೋಷಕರನ್ನು (ಅತ್ತೆ-ಮಾವ ಸೇರಿದಂತೆ) ಅವಲಂಬಿತರನ್ನಾಗಿ ಸೇರಿಸಲು ಬಯಸಿದರೆ, ಇಬ್ಬರೂ ಪ್ರತ್ಯೇಕವಾಗಿ ನೋಂದಾಯಿಸಿಕೊಳ್ಳಬೇಕಾಗುತ್ತದೆ.
4. ಅವಲಂಬಿತರ ಅರ್ಹತಾ ಮಾನದಂಡಗಳು
ಪುತ್ರ/ಪುತ್ರಿ: ಉದ್ಯೋಗಿಗಳಾಗುವವರೆಗೆ ಅಥವಾ 30 ವರ್ಷ ವಯಸ್ಸು ಮೀರುವವರೆಗೆ ಇಲ್ಲವೇ ವಿವಾಹವಾಗುವವರೆಗೆ ಅರ್ಹರು. ಶಾಶ್ವತ ದೈಹಿಕ ಅಥವಾ ಮಾನಸಿಕ ಅಂಗವೈಕಲ್ಯದಿಂದ ಬಳಲುವ ಮಕ್ಕಳಿಗೆ ವಯಸ್ಸಿನ ಮಿತಿ ಅನ್ವಯಿಸುವುದಿಲ್ಲ.
ಪೋಷಕರು/ಅತ್ತೆ-ಮಾವ: ಸರಕಾರಿ ನೌಕರರೊಂದಿಗೆ ವಾಸವಾಗಿರಬೇಕು ಮತ್ತು ಅವರ ಮಾಸಿಕ ಆದಾಯ/ಕುಟುಂಬ ಪಿಂಚಣಿ ₹1,27,000 (ಚಾಲ್ತಿಯಲ್ಲಿರುವ ತುಟ್ಟಿಭತ್ಯೆ ಸೇರಿ) ಮೀರುವಂತಿಲ್ಲ.
ಚಿಕಿತ್ಸಾ ಸೌಲಭ್ಯಗಳು ಮತ್ತು ನಿಯಮಗಳು
ಚಿಕಿತ್ಸೆಗೆ ಸಂಬಂಧಿಸಿದ ಪ್ರಮುಖ ನಿಯಮಗಳು
- ವೈದ್ಯರ ಶಿಫಾರಸು (Referral): ಚಿಕಿತ್ಸೆ ಪಡೆಯಲು ಯಾವುದೇ ವೈದ್ಯರಿಂದ ಶಿಫಾರಸು ಪತ್ರ ತರುವ ಅಗತ್ಯ ಇರುವುದಿಲ್ಲ.
- ಒಳರೋಗಿ ಚಿಕಿತ್ಸೆ (In-patient): ಹಗಲು ಚಿಕಿತ್ಸಾ ಕೇಂದ್ರ, ಕಣ್ಣಿನ ಚಿಕಿತ್ಸಾ ಆಸ್ಪತ್ರೆ, ದಂತ ಚಿಕಿತ್ಸಾ ಆಸ್ಪತ್ರೆಗಳೂ ಸೇರಿದಂತೆ ಒಳರೋಗಿ ಚಿಕಿತ್ಸೆಗೆ ಸೌಲಭ್ಯ ಲಭ್ಯವಿದೆ.
- ಹೊರರೋಗಿ ಚಿಕಿತ್ಸೆ (OPD): ಯೋಜನೆಯಡಿ ಹೊರರೋಗಿ ಚಿಕಿತ್ಸೆ ನಗದುರಹಿತವಾಗಿರುವುದಿಲ್ಲ. ಔಷಧೋಪಚಾರಕ್ಕೆ ನೌಕರರು ಭರಿಸಿದ ವೆಚ್ಚವನ್ನು ನಿಯಂತ್ರಣಾಧಿಕಾರಿಗಳಿಂದ ಮರುಪಾವತಿ ಮಾಡಿಕೊಳ್ಳಬಹುದು.
- ವಿಶೇಷ ಚಿಕಿತ್ಸೆಗಳು: IVF, ರಿಪ್ಲೇಸ್‌ಮೆಂಟ್, ಮತ್ತು ಅಂಗಾಂಗ ಕಸಿ (ಟ್ರಾನ್ಸ್‌ಪ್ಲಾಂಟ್) ಚಿಕಿತ್ಸೆಗಳಿಗೆ ಪೂರ್ವಾನುಮೋದನೆ ಕಡ್ಡಾಯ. IVF ಚಿಕಿತ್ಸೆಗೆ ಜಿಲ್ಲಾ ಸರಕಾರಿ ಸ್ತ್ರೀರೋಗ ತಜ್ಞರ ಶಿಫಾರಸು ಅಗತ್ಯ.
- ಭೇಟಿ ಮಿತಿ: ಫಲಾನುಭವಿಯು ಒಂದು ತಿಂಗಳ ಅವಧಿಯಲ್ಲಿ ಒಂದೇ ನೋಂದಾಯಿತ ಆಸ್ಪತ್ರೆಗೆ ಗರಿಷ್ಠ ಮೂರು ಬಾರಿ ಭೇಟಿ ನೀಡಬಹುದು ಮತ್ತು ಪ್ರತಿ ಭೇಟಿ ವೇಳೆ ಮೂರು ವಿಭಿನ್ನ ತಜ್ಞರನ್ನು ಭೇಟಿ ಮಾಡಲು ಅವಕಾಶವಿದೆ.
- ಪಾವತಿ ವ್ಯವಸ್ಥೆ: CGHS ವೈದ್ಯಕೀಯ ಚಿಕಿತ್ಸಾ ಆಧಾರದ ಮೇಲೆ ಯಾವುದೇ ಮಿತಿ ಇಲ್ಲದೆ ಪಾವತಿ ವ್ಯವಸ್ಥೆ ಕಲ್ಪಿಸಲಾಗಿದೆ.
ಆಸ್ಪತ್ರೆ ವಾರ್ಡ್ ಸವಲತ್ತು
ನೌಕರರ ಗುಂಪಿನ ಆಧಾರದ ಮೇಲೆ ವಾರ್ಡ್ ಸೌಲಭ್ಯವನ್ನು ನಿಗದಿಪಡಿಸಲಾಗಿದೆ:
| ನೌಕರರ ಗುಂಪು | ವಾರ್ಡ್ ಸವಲತ್ತು |
| ಗ್ರೂಪ್-ಎ ಮತ್ತು ಬಿ | ಪ್ರೈವೇಟ್ ವಾರ್ಡ್ |
| ಗ್ರೂಪ್-ಸಿ | ಸೆಮಿ ಪ್ರೈವೇಟ್ ವಾರ್ಡ್ |
| ಗ್ರೂಪ್-ಡಿ | ಜನರಲ್ ವಾರ್ಡ್ |
ನಿಗದಿಪಡಿಸಿದ ಮಾನದಂಡಕ್ಕಿಂತ ಉನ್ನತ ಮಟ್ಟದ ವಾರ್ಡ್ ಸೇವೆ ಬಯಸಿದರೆ, ಫಲಾನುಭವಿಯು ವ್ಯತ್ಯಾಸದ ಹಣವನ್ನು ಪಾವತಿಸಿ ರಸೀದಿ ಪಡೆಯಲು ಅವಕಾಶವಿದೆ.
ತುರ್ತು ಚಿಕಿತ್ಸೆ ಮತ್ತು ಮರುಪಾವತಿ
- ನೋಂದಣಿಯಾಗದ ಆಸ್ಪತ್ರೆಯಲ್ಲಿ: ತುರ್ತು ಸಂದರ್ಭದಲ್ಲಿ ಖಾಸಗಿ ನೋಂದಾಯಿತವಲ್ಲದ ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ಪಡೆದರೆ, ಚಿಕಿತ್ಸಾ ವೆಚ್ಚವನ್ನು KASS ದರ ಅಥವಾ ನಿಜವಾದ ವೆಚ್ಚ (ಯಾವುದು ಕಡಿಮೆಯೋ ಅದನ್ನು) ಪರಿಗಣಿಸಿ ಇಲಾಖಾ ಮುಖ್ಯಸ್ಥರಿಂದ ಮರುಪಾವತಿ ಮಾಡಿಕೊಳ್ಳಲು ಅವಕಾಶವಿದೆ.
- ಅಂತರ-ರಾಜ್ಯ ಪ್ರವಾಸದ ವೇಳೆ: ಹೊರ ರಾಜ್ಯದಲ್ಲಿ ಪ್ರವಾಸದಲ್ಲಿದ್ದಾಗ ತುರ್ತು ಚಿಕಿತ್ಸೆ ಪಡೆದರೆ, KASS ದರದನ್ವಯ ವೆಚ್ಚವನ್ನು ಸಂಬಂಧಪಟ್ಟ ಇಲಾಖಾ ಮುಖ್ಯಸ್ಥರಿಂದ ಮರುಪಾವತಿ ಮಾಡಿಕೊಳ್ಳಬಹುದು.
- ಆಂಬ್ಯುಲೆನ್ಸ್ ಶುಲ್ಕ: ನಗರ ವ್ಯಾಪ್ತಿಯಲ್ಲಿ ಪಡೆದ ಆಂಬ್ಯುಲೆನ್ಸ್ ಸೇವೆಗೆ ಶುಲ್ಕ ಮರುಪಾವತಿಗೆ ಅವಕಾಶವಿದೆ.
ನೋಂದಾಯಿತ ಆಸ್ಪತ್ರೆಗಳ ಪಟ್ಟಿ ಮತ್ತು ಇತರೆ ಆದೇಶಗಳು:
📞 ಸಹಾಯ ಮತ್ತು ದೂರು ನಿವಾರಣೆ
- ಸಹಾಯವಾಣಿ (ಹೆಲ್ಪ್‌ಲೈನ್): ಆಸ್ಪತ್ರೆಗಳ ಚಿಕಿತ್ಸಾ ಸಂಬಂಧಿತ ಮಾಹಿತಿ ಮತ್ತು ವಿಚಾರಣೆಗಾಗಿ ನೀವು 18004258330 ಈ ದೂರವಾಣಿ ಸಂಖ್ಯೆಯನ್ನು ಸಂಪರ್ಕಿಸಬಹುದು.
- ಕುಂದುಕೊರತೆ ನಿವಾರಣೆ: ನೋಂದಾಯಿತ ಆಸ್ಪತ್ರೆಗಳಲ್ಲಿ ವೈದ್ಯಕೀಯ ನಿರ್ಲಕ್ಷ್ಯವಾದರೆ, ಎಲ್ಲ ದಾಖಲೆಗಳೊಂದಿಗೆ ಜಿಲ್ಲಾಧಿಕಾರಿಗಳ ಕುಂದುಕೊರತೆ ಅಧಿಕಾರಿಗಳನ್ನುಅಥವಾ ರಾಜ್ಯ/ಭಾರತೀಯ ವೈದ್ಯಕೀಯ ಮಂಡಳಿಯನ್ನು ಸಂಪರ್ಕಿಸಬಹುದು.
ಈ ಯೋಜನೆಯು ರಾಜ್ಯ ಸರಕಾರಿ ನೌಕರರು ಮತ್ತು ಅವರ ಅವಲಂಬಿತರ ಆರೋಗ್ಯ ಸುರಕ್ಷತೆಯನ್ನು ಖಚಿತಪಡಿಸಿಕೊಳ್ಳುವಲ್ಲಿ ಮಹತ್ವದ ಪಾತ್ರ ವಹಿಸುತ್ತದೆ. ನಿಮ್ಮ ಮತ್ತು ನಿಮ್ಮ ಕುಟುಂಬದ ಉತ್ತಮ ಆರೋಗ್ಯಕ್ಕಾಗಿ ಈ ಯೋಜನೆಯನ್ನು ಸದುಪಯೋಗಪಡಿಸಿಕೊಳ್ಳಿ.
-----
🖋️ ಸೂಚನೆ:
ಈ ಲೇಖನ ಮಾಹಿತಿ ಹಂಚಿಕೆ ಉದ್ದೇಶಕ್ಕಾಗಿ ಮಾತ್ರ ಪ್ರಕಟಿಸಲಾಗಿದೆ., ಅಧಿಕೃತ ಮಾಹಿತಿಗಾಗಿ https://sast.karnataka.gov.in/sast/English/ ಅಥವಾ https://arogya.karnataka.gov.in/
ವೆಬ್‌ಸೈಟ್‌ಗೆ ಭೇಟಿ ನೀಡಿ.
You May Also Like 👇
Loading...